நீங்கள் ஈடுபட்டுள்ள ''ஸம்கீர்த்தனத்தின் ''( பஜனை பாடுவது) உண்மையான சிறப்பை நீங்கள் ஆராய வேண்டும். '' கீர்த்தன் '' என்பது இறைவனது பெருமையை உரக்கப் பாடுவதாகும். '' ஸம்கீர்த்தன் '' என்பது உதடுகள் அல்லது நாவிலிருந்து அல்லாது இதயத்திலிருந்து ஊற்றெடுத்துப் பாடும் முறையாகும். இது,இறைவனது மஹிமையை எண்ணும்போது, இதயத்தில் பொங்கி எழும் ஆனந்தக் கிளர்ச்சியின் வெளிப்பாடாகும். இது தன்னிச்சையாகத் தோன்றும் உள்ளார்ந்த பேரானந்தத்தின் சின்னமாகும்; பிறரது புகழ்ச்சியையோ, இகழ்ச்சியையோ பற்றி இதில் கவலைப்படுவதில்லை.இது கேட்பவர்களின் பாராட்டையோ,போற்றுதலையோ நாடுவதில்லை. இது ஒருவரது சொந்த ஆனந்தம், திருப்தி மற்றும் மகிழ்ச்சிக்காக பாடப்படுகிறது.இப்படிப் பட்ட தலை சிறந்த '' கீர்த்தனத்தம்'' மட்டுமே,'' ஸம்கீர்த்தன் '' என்று அழைக்கத் தகுதி உடையது. இந்த உயரிய கோட்பாட்டிற்காகவே, உலகளாவிய அகண்ட பஜன் என்ற நிகழ்ச்சி ஏற்படுத்தப் பட்டுள்ளது. இறைவனுக்கான இந்த ஆழ்ந்த ஏக்கத்தைப் பாடுவதும், அவனைப் போற்றுவதில் கிடைக்கும் அனுபவத்தினால் ஆனந்தம் அடைவதும், சுற்றுப் புறத்தைத் தூய்மைப் படுத்த உதவுகிறது.இந்த உயர்ந்த நோக்கத்தைக் கருத்தில் கொண்டே, உலகளாவிய இந்த அகண்ட பஜன் என்ற நிகழ்ச்சி ஏற்பாடு செய்யப் பட்டுள்ளது.