ஆன்மீக சாதகனுக்கு, இறைவனது ''ஸகுண'' (உருவமுள்ள),'' நிர்குண '' ( உருவமற்ற அல்லது அரூபமான) தன்மைகளில், எது உண்மையானது அல்லது சிறந்தது என்ற வியப்பு தோன்றுகிறது. அந்த இரண்டுமே தண்ணீர் மற்றும் பனிக்கட்டி போன்றவை என்பதைப் புரிந்து கொள்ளுங்கள். தண்ணீருக்கு ரூபம் இல்லாவிட்டாலும், அது இருக்கும் பாத்திரத்தின் ரூபத்தை ஏற்றுக் கொள்கிறது. தண்ணீரும் பனிக்கட்டியும் ஒன்றே. அதைப் போலவே இந்த இரண்டு விதமான வழிபாடுகளிலும் எந்த வித்தியாசமும் இல்லை. ஆன்மீகப் பயணத்தில் , ''ஸகுண'' மற்றும்'' நிர்குண ''தியானங்கள் வலது மற்றும் இடது பாதங்களைப் போன்றவை. இறைவனது ஒரு ரூபத்தை வழிபடும்போது, அதன் அடிப்படையில் உள்ள உருவமற்ற தன்மையை மனதில் கொள்ளுங்கள். இறைவனது மஹிமையை வார்த்தைகள் அல்லது வழிபாடுகளின் மூலம் ஒருபோதும் வரையறுக்க முடியாது என்பது நினைவிருக்கட்டும். அதைப் போலவே, '' நிர்குண '' தியானத்தின் போது, அது ஏற்றுள்ள இறைவனது ரூபத்தின் மேன்மை மற்றும் மஹிமையைக் குறைக்கவோ அல்லது அதன் மீது கொண்ட நம்பிக்கையை இழக்கவோ செய்யாதீர்கள். எப்படியானாலும், இறுதிக் காலடி மங்களகரமான வலது பாதமான '' நிர்குண ''த் தன்மையினுடையதாகவே இருக்க வேண்டும்.