உணவு மற்றும் குடிக்கும் பழக்கங்களை மிதமாக்கி, சரியாக முறைப் படுத்துவதன் மூலம், ஆன்மீக வாழ்க்கைக்கு அடித்தளம் இட இயலும். ரஜோ குணமுள்ள உணவிற்கு பதிலாக சாத்வீகமான( தூய்மையான மற்றும் மரக்கறி ) உணவையே நீங்கள் தேர்ந்தெடுக்க வேண்டும். போதை தரும் பொருட்களை உட்கொள்வதனால்,ஒருவன் தனது உணர்வுகள், உணர்ச்சிகள், தூண்டுதல்கள், பேச்சு மற்றும் செயல்களின் கட்டுப் பாட்டை இழந்து விடுகிறான்; ஏன் ஒருவன் மிருகங்களின் நிலைக்குக் கூடத் தாழ்ந்து விடுகிறான். மாமிசத்தை உண்பதன் மூலம் ஒருவருக்கு வன்முறையான உணர்வுகளும்,மிருக சம்பந்தப் பட்ட வியாதிகளும் உண்டாகின்றன. ரஜோ குணமுள்ள உணவை ஒருவர் உட்கொள்வதால், மனம் மேலும் கட்டுக்கு அடங்காமல் போய் விடுகிறது.இப்படிப் பட்ட உணவை ரசித்து உண்டு விட்டால், மனதை மறுபடியும் சீர் படுத்துவது கடினமாகி விடுகிறது. இறைவன் மீது மனம் நிலை கொள்ள வேண்டும் என்றால், உடல் , மனம் என்ற இரண்டின் மூலமும் உட்கொள்ளும் ஆகாரத்தில் மிகவும் கவனமாக இருத்தல் வேண்டும்.