ஒவ்வொரு படியிலும், பற்றற்ற மனப்பாங்கைக் கடைப் பிடியுங்கள்; இல்லை எனில், பேராசையும், கஞ்சத்தனமும் உங்களது சீரிய மனித இயல்பை அடக்கி ஆட்கொண்டு விடும். உங்களது உயர்ந்த இயல்பைச் செம்மைப் படுத்தி,ஆசைகளைக் குறைத்துக் கொண்டு, உங்களது பழக்க வழக்கங்களை சீர் திருத்தி,இறைவனது அருளை ஈட்ட முயலுங்கள். ஒவ்வொரு படியும்,அடுத்த படியை சுலபமாக்குகிறது; இதுவே ஆன்மீகப் பாதையின் சிறப்பு.ஒவ்வொரு படியிலும், உங்களது வலிமையும், தன்னம்பிக்கையும் வளர்ந்து, மேலும் மேலும் அதிக அளவில் இறை அருளைப் பெறுகிறீர்கள். இன்று குருபூர்ணிமா தினத்தில் , நீங்கள் தேர்ந்தெடுத்துள்ள ஆன்மீகப் பாதையில் மனமார்ந்து செல்லுமாறு பணிக்கிறேன்.பலர் என்னைக் கேட்கிறார்கள், '' சுவாமி ! நான் ஜபிப்பதற்கு இறைவனது ஒரு நாமத்தை, எனக்கு அருளுங்கள்'' என்று. உங்களுக்குப் பிடித்த எந்த இறை நாமத்தை வேண்டுமானாலும் எடுத்துக் கொள்ளுங்கள்; அவனது அனைத்து நாமங்களும் சரி சமமாக இனிமையானவையே. ஆன்மீகத்தில் நாடு, குலம் என்ற வித்தியாசங்கள் கிடையாது; அனைவரும் இறைவனது சாம்ராஜ்யத்தைச் சேர்ந்தவர்களே.