தியாகம் என்பது மனித குணங்களில் ஒரு அங்கம்.இளைஞர்கள் மனதில் உட்கொள்ள வேண்டிய குணங்களில் ஒன்று. தான தர்மங்கள் செய்வது தான் தியாகம் என்று சாதாரணமாகக் கருதப் படுகிறது. தான தர்மங்களுக்கும், தியாகத்திற்கும் பரந்த வித்தியாசம் உள்ளது. அறப்பணி செய்வோர், தங்களது செல்வத்திலிருந்து ஒரு சிறிய பகுதியைத் தான் பிறருக்குக் கொடுக்கிறார்கள். நிலதானம், அன்ன தானம்,சிரமதானம் மற்றும் வித்யாதானம் என்பவை இதில் அடங்கும். இப்படிப் பட்ட அறப்பணிகளில் யாரும் தன்னிடம் இருக்கும் அனைத்தையும் கொடுப்பதில்லை. இதிலிருந்து ஒரு படி மேல் சென்று, சிலர்,நியாயமான மற்றும் அத்தியாவசியமானவற்றை மட்டும் தமக்கென்று வைத்துக் கொண்டு, மீதி அனைத்தையும் சமுதாயத்திற்கு அளித்து விடுகிறார்கள். இப்படிப் பட்டவர்கள் உலகில் மிக உயர்ந்த புகழை அடைகிறார்கள். நமது புனித நூல்கள், ஒருவர் தனது செல்வத்தில் ஒரு பகுதியை வைத்துக் கொண்டு, மீதமுள்ளதை ஏழைகளுக்கும், ஆதரவற்றவர்களுக்கும் அளிக்க வேண்டும் என்று அறிவுறுத்துகின்றன.